Монголын Хөл Бөмбөгийн Холбооноос клуб, гишүүн холбоодыг дэмжих хөтөлбөрийн хүрээнд Үндэсний Дээд лиг, Эмэгтэйчүүдийн Дээд лиг, Үндэсний Нэгдүгээр лиг, Футзалын Дээд лигийн клубүүд болон орон нутаг дахь гишүүн холбоодтой хамтын ажиллагааны гэрээг байгуулаад байна.

Сар бүр тогтмол олгох мөнгөн дэмжлэгийг дээрх лигийн клубүүд маань үндсэн багийн болон өсвөрийн дасгалжуулагч нарын боловсрол, хөгжил болон МХБХ-ны клуб лицензжүүлэх журмын дагуу тогтвортой үйл ажиллагаанд зарцуулах юм.

Дэлхий даяар нүүрлээд буй халдварт өвчний хүнд цаг үед МХБХ-ноос энэхүү дэмжих гэрээг байгуулсан нь эдийн засгийн хүндрэлтэй тулгараад буй клубүүдээ дэмжиж буй бодит, сайн менежментийн ажил болж чадаж байгааг клубийн удирдлагуудаас илэрхийлсээр байна.

Санхүүжилт 38 клубт олгогдохоос 35 клубт тогтмол олгогдож байгаа бөгөөд 35 клубийн сарын санхүүжилт 29.800.000 байна.

Гишүүн холбоодын үйл ажиллагааг дэмжих ажлын байр /оффис/ түрээсийн төлбөр нийт 21 аймгийн хөл бөмбөгийн холбоодод олгогдоно.

Түрээсийн санхүүжилт сарын 300.000 төгрөг байх бөгөөд одоогоор 5 аймгийн гэрээ батлагдаж, МХБХ-ноос сард 1.500.000 төгрөгийн санхүүжилт олгож байна.

ГИШҮҮН БАЙГУУЛЛАГУУДЫН МЕНЕЖМЕНТИЙН ХЭЛТЭС