“Болован” хар салхи умард Солонгосын баруун эргийг дайрч өнгөрөхдөө 48 хүний аминд хүрсэн байна. Умардын мэдээллийн ЦТАК агентлагийн өнөөдөр  дамжуулсан мэдээгээр бол өөр бас 50 хүний биед гэмтэл учирч зарим нь сураггүй алга болжээ.  Хар салхины улмаас 21 мянган хүн орон оронгүй хоцорч, олон арван барилга нурж сүйдсэн байна. Рёсёнганы цахилгаан станц ажилгүй болж Хэжү, Кэсон зэрэг томоохон хотууд цахилгаан эрчим хүчгүй болжээ.   НҮБ, Олон улсын Улаан загалмай, улаан хавирган сар нийгэмлэг гамшиг болсон газруудад хүмүүнлэгийн тусламж илгээж эхэлсэн байна.
Өнгөрсөн зун Умард Солонгост үер, болон хэт халуунаас болж 170 орчим хүн амиа алдсан бол 212 мянган хүн орох оронгүй болсон юм.