Монголбанкны худалдан авсан үнэт металлын хэмжээ тавдугаар сард хоёр дахин өсөж, 2.6 тонн хүрлээ. Он гарснаас хойш нийт 6.9 тонныг худалдан аваад байна.

Энэ нь өмнөх оны мөн үеэс 1.7 тонноор буурсан үзүүлэлт боллоо. Монголбанк өнгөрсөн жилүүдэд алт тушаалтыг дэмжих хөтөлбөр, арга хэмжээнүүд хэрэгжүүлсэн юм. Үр дүнд нь 2020 онд худалдан авсан үнэт металлын хэмжээ түүхэн дээд цэгт хүрч, 23 тонн давжээ. Дөрөвдүгээр сарын урьдчилсан гүйцэтгэлээр гадаад валютын албан нөөцийн хэмжээ 4.9 тэрбум ам.доллар буюу түүхэн дээд түвшинд хүрээд байна. Түүнчлэн валютын нөөц цаашид өсөх төлөвтэй байгаа юм. Сүүлийн саруудад олон улсын зах зээлд алтны үнэ буурах хандлагатай байсан ч дөрөвдүгээр сараас эргэн өсөж эхэлжээ.

Даваа гарагийн байдлаар олон улсын таваарын зах зээлд алтны спот үнэ 0.3 хувиар буурч, унц нь 1871 орчим ам.доллар хүрээд байна.