2021 оны 06 дугаар сарын 10ны өдөр Олон улсын олимпийн хорооны гүйцэтгэх зөвлөл хуралдаж самбо бөхийн төрлийг спорт болон /Олон улсын самбо бөхийн холбоо буюу FIAS/ийг бүрэн хүлээн зөвшөөрөхөөр боллоо. Энэ хүлээн зөвшөөрсөн зөвлөмжийг ирэх 07-р сарын 20-21-ний өдрүүдэд Токио (Япон) -т болох ОУОХ-ны хуралдаанд албан ёсоор танилцуулахаар болжээ.
ОУОХ-ноос /FIAS/-т ирүүлсэн албан бичигт "Байгууллагын хөгжил, самбо бөхийн спортыг сурталчлах, ахиулах, түүнтэй холбоотой асуудлуудын хүрээнд хийсэн ажил, ололт амжилтыг үнэлж, бид халуун баяр хүргэе" гэж бичиж тэмдэглэсэн байжээ.
Та бүхэн сайн санаж байвал 2018 оны 11-р сарын 30-ны өдөр Японы Токио хотод болсон Олон Улсын Олимпийн Хорооны Гүйцэтгэх зөвлөлийн хурлын үеэр Олимпийн Хартийн 25-р дүрмийн дагуу Олон улсын SAMBO бөхийн Холбоо (FIAS) -г түр буюу 3 жилийн хугацаатай хүлээн зөвшөөрсөн билээ. Тэрхүү хугацаанд олон улсын самбо бөхийн холбоо нь ололт амжилттай ялангуяа сүүлийн 10 жил идэвхитэй үйл ажиллагаагаа явуулж буйг нь үнэлсэн байдаг. Энэ мэдээг хүлээн авсан /FIAS/ ийн ерөнхийлөгч Василий Шестаков тухайн үед :
“Бид урагшлах хамгийн том, магадгүй хамгийн хэцүү алхамыг хийж чадлаа. Гэхдээ олон ажил хүлээж байна. Дараагийн алхам бол ОУОХ-ны байнгын хүлээн зөвшөөрөлтийг олж аваад дараа нь Олимпийн наадмын хөтөлбөрт хамруулах явдал юм. Бид үүнийг даван туулж чадна гэдэгт итгэлтэй байна! ” гэж хэлж байжээ. Иймд самбо бөхийн төрөл тун удахгүй олимпийн наадмын хөтөлбөрт багтах боломжтой болж байна.
