Францын Ерөнхий сайд асан Доминик де Вильпенийг өчигдөр өглөөгүүр цагдаагийнхан баривчилжээ.  Францад зочид буудал, зоогийн газрын сүлжээ  эрхэлдэг  арилжааны “Relais & Chateaux” групптэй холбоотой шуугианаас болж түүнийг байцаасны дараа ийнхүү баривчилсан байна. Ерөнхий сайд асантай найз, энэ группийн тэргүүн байсан Режи Булог гэмт хэргийн зохион байгуулалттай бүлэглэлд орж хөрөнгө завшсан гэж буруутган 2011 онд баривчилжээ. Мөрдөн байцаалтын явцад Режи Було хууль бус ажиллагаа явуулж, баримт бичиг үйлдэн 1,6 сая евро завшсан  нь илрээд байгаа юм. Хавтаст хэрэгт Режи Було Ерөнхий сайд Доминик де Вильпентэй утсаар ярьж байсан бичлэг байгаагаас түүнийг ийнхүү саатуулах болсон байна. Доминик де Вильпен үүний өмнө “Relais & Chateaux”-ийн хэрэгт өөрийгөө ямар хамаагүй гэж мэдэгдэж байсан юм.