Бүгд Найрамдах Чех Улсын Усти над Орлици хотноо энэ сарын 4-7-ны өдрүүдэд болсон Коцианы нэрэмжит олон улсын өсвөрийн хийлчдийн тэмцээний 11-12 насны ангилалд Монгол Улсын Консерваторын сурагч А.Хулан тэргүүн байрт оржээ. 64 дэх удаагаа зохион байгуулагдаж буй уг тэмцээнд Монгол хүүхэд анх удаагаа түрүүлсэн сайхан мэдээг тус улсад суугаа Монгол Улсын ЭСЯ-наас дуулгалаа. Коцианы нэрэмжит тэмцээнд оролцсон Б.Насанжаргал, Н.Гүнзээ нар тус тусын насны ангилалдаа 3 дугаар байрт шалгарсан бол У.Намуунбайгаль, М.Мөрөн-Рюки нар тусгай 1 дүгээр байр, Т.Пүрэвцэцэг, А.Анхзаяа, нар тусгай 3 дугаар байрт орсон амжилт үзүүлжээ.