Гадаад харилцааны сайд Б.Батцэцэг өнөөдөр /2022.12.08/ Германы Мюнстер хотын Урлагийн академид суралцаж төгссөн зураач Ц.Ган-Эрдэнийг хүлээн авч уулзан, Монгол Улсын Соёлын элчийн гэрчилгээг гардуулжээ.
Соёлын элч Ц.Ган-Эрдэнэ нь ХБНГУ-ын Бюделсдорф хотноо зохион байгуулдаг “НордАрт” олон улсын дүрслэх урлагийн үзэсгэлэнд Монголын уран бүтээлчид оролцох эхлэлийг тавьж, Монголын дүрслэх урлагийн салбарын ололт амжилтыг гадаадын улс орнуудад танилцуулан сурталчлахад үнэтэй хувь нэмэр оруулсны зэрэгцээ “Мөнх хөх тэнгэр", “Толин тусгал", "Анхны болзоо", "Бодит байдал нь хоосон зүйл" зэрэг бие даасан үзэсгэлэнг Испани, Герман, Бельги, Нидерланд, Дани, Солонгос зэрэг улс орнуудад гаргасан байна.
Түүний арга барил тун өвөрмөц. Учир нь тэрбээр бидний оршин буй ертөнцийг усны тусгалаар дамжуулан “өгүүлдэг”. Магадгүй энэ бүхэн хувь уран бүтээлчийн дотоод философи биз ээ. Үүгээрээ ч тэр баруунд илүү танигдсан уран бүтээлч. Тэр бол зураач Ц.Ган-Эрдэнэ юм.
Монголын Дүрслэх урлагийн дээд сургууль, Германы Мюнстер хотын Урлагийн академид суралцаж төгссөн тэрбээр Герман болон Европын холбооны улсуудад бие даасан болон хамтарсан олон үзэсгэлэнгээ дэлгэсэн. Зураач Ц.Ган-Эрдэнэ Герман улсад 21 дэх жилдээ суурин амьдарч, Герман уран бүтээлчидтэй хамтран уран бүтээлээ хийж байна.
