Энэ жил эх орондоо хоёр дахь тоглолтоо өнгөрсөн зургадугаар сард хийсэн "The Hu" хамтлаг дэлхийн аялан тоглолтоо эхлүүлээд буй. Тэд зургадугаар сарын 3-наас Европ, Латин Америк дахь аялан тоглолтоо эхлүүлсэн. Хамтлагийн залуус Монголд зургадугаар сарын 1-4-ний хооронд болсон “Power expo & Fest” наадмын тайзнаа тоглосон юм. Тэд эх орондоо байх хугацаандаа гурав дахь цомгийнхоо ажилдаа орж, их л завгүй байгаагаа хэлж байв.
Харин одоо хамтлагийн залуус аялан тоглолтоо хийж байгаа бөгөөд ирэх есдүгээр сард АНУ-д тоглохоор хуваариа гаргажээ.
"The Hu" хамтлагийнхан "Rumble of Thunder" нэртэй хоёр дахь цомгоо худалдаанд гаргаад буй. Шинэ цомогт "Учиртай гурав", "Шихихутаг", "Татар дайчин", "Хар аянга", "Байгаль эх" гэх мэт нийт 13 дуу багтсан.
2016 онд байгуулагдсанаасаа хойш богино хугацаанд олон улсад танигдаж чадсан Монголын амжилттай хамтлаг бол яах аргагүй "The Hu".
