Жүжигчин Б.Амарсайханы найруулагчаар ажилласан анхны бүтээл “Эргэж ирэхгүй намар" уран сайхны кино олон улсын кино наадамд шалгарчээ. 

АНУ-ын Чикаго хотноо 15 дахь удаагаа зохион байгуулж буй “Chicago's Asian Pop Up Cinema” фестиваль жүжигчин Б.Амарсайханы кино урлагт 24 жил ажиллаж, кино урлагт оруулж буй хувь нэмэр, уран бүтээлчийн замналыг нь онцлон үнэлжээ.

Монгол Улсаас анх удаагаа “Netflix”-ийн Марко Поло цувралд дүр бүтээж, мөн олон улсад Монголын орчин цагийн киног таниулж явааг нь онцлон уг шагналыг олгож буйгаа фестивалийн захирал, хатагтай Софиа Вон Бочиа дурдсан юм. 

Үүний дараагаар “Эргэж ирэхгүй намар” киног үзсэн үзэгчид найруулагч, жүжигчин Б.Амарсайхан болон продюсер С.Уран нартай киноны тухай болон Монголын ахуй соёл, өв соёлын онцлогийн талаар дэлгэрэнгүй асуулт, хариулт өрнүүлжээ. 

Нээлтэд Чикаго хотын “Гийнгоо” морин хуурын чуулгын хүүхдүүд болон Монгол Улсаас АНУ-ын Чикаго хотод суугаа Консулын газрын төлөөлөл оролцов. Тус киног суугаа орны үзэгчид болон Чикаго хот орчимд амьдардаг монгол иргэд хүрэлцэн ирж үзэн танхим дүүрэн алга ташилтаар үнэлж байлаа гэж Чикаго дахь Монгол Улсын Консулын газар мэдээлэв.