"Болор цом-41" яруу найргийн наадамд МЗЭ-ийн гишүүн, Г.Сэр-Одын нэрэмжит шагналт, Сүхбаатар аймгийн Дарьганга сумын харьяат яруу найрагч Сайнжаргалын Начин түрүүлж, тэргүүн цом өргөлөө. Шилдэг 21 яруу найрагч өрсөлдөх "Болор цом-41" наадам өчигдөр /2023.11.26/17.00 цагаас Соёлын төв өргөөнд болов.
Энэ жилийн наадмын тэргүүн шүлэгч С. Начин "Болор цом наадамд 12 жил оролцсон байна. Бичгийн шатанд хоёр удаа хасагдаж байсан. Энэ торгон агшинд гарыг минь ганзганд хөлийг минь дөрөөнд хүргэсэн эрхэм багш Пүрэвхүүгийн Батхуяг багшаа дурсмаар байна. Багшийн минь бие энд байхгүй ч билиг оюун нь мөнхөд үргэлжилнэ гэж хэлэхийг хүсч байна, баярлалаа. Намайг 10 жил наадамд оролцоход аав минь үзэхээр ирж байгаагүй. Харин өнөөдөр ирсэн" хэмээн баярын сэтгэгдлээ хуваалцсан юм.
Эгшиглэнт эхийн хишигт найрагч тодруулах “Болор цом” яруу найргийн 40 дэх удаагийн наадамд Архангай аймгийн Хотонт нутгийн хүү, яруу найрагч Мягмарын Амархүү түрүүлж, “Болор цом”-ын эзэн болсон.
Харин 39 дэх удаагийн “Болор цом” яруу найргийн наадамд МЗЭ-ийн болон Г.Сэр-Одын нэрэмжит шагналт яруу найрагч Б.Болорцэрэн түрүүлсэн. Мөн 38 дахь удаагийн “Болор цом” наадамд Монголын үндэсний олон нийтийн радиогийн редактор, яруу найрагч О.Цэнд-Аюуш түрүүлж байсан бол “Болор цом-37” наадамд яруу найрагч Б.Жамбалдорж "Жамын цас" шүлгээрээ тэргүүн байр эзэлсэн билээ.
Монгол Улсын Хөдөлмөрийн баатар, Ардын уран зохиолч Д.Пүрэвдорж агсны санаачилгаар 1983 оны арванхоёрдугаар сард анхны "Болор цом" наадам зохион байгуулагдсан түүхтэй.
