Kонсул асан Д.Мөнх-Эрдэнийг албан тушаалын байдлаа урвуулан ашигласан, бусдад хахууль өгсөн гэх хэрэгт буруутган анхан шатны шүүхээс 3 жил 10 сарын хорих ял, 2.7 сая төгрөгөөр торгох ялаар шийтгэсэн бол давж заалдах шатны шүүх уг ялыг хөнгөрүүлж, 1 жил 10 сарын хорих ял оноосон. Харин Улсын дээд шүүх Д.Мөнх-Эрдэнэ нарын гомдлыг хэлэлцэхээс татгалзаж шийдвэрлэснээр түүнд оноосон 1 жил 10 сарын хорих ял хэвээр үлдсэн билээ. 

Өдгөө ШШГЕГ-ын харьяа Хорих 441 дүгээр ангид ял эдэлж буй Д.Мөнх-Эрдэнийн магадлалд орох эрх нь өнгөрсөн арваннэгдүгээр сарын 5 /2023.11.05/-ны өдөр нээгдсэн ч тэрбээр магадлалд орж, суллагдах боломжгүй болоод байгаа аж. 

Тодруулбал, Хорих 413 дугаар хорих ангийн дарга А.Батхуяг "Д.Мөнх-Эрдэнийг ял эдэлж байхдаа хорих ангийн алба хаагчдын тавьсан хууль ёсны шаардлагыг биелүүлээгүй, дотоод журам зөрчсөн" гэх үндэслэлээр зөрчлийн арга хэмжээ авсан аж. Эрүүгийн хуульд "Ялтан зан байдлаараа нийтэд аюулгүй болсноо нотлон харуулж, ял эдлэх хугацаандаа ноцтой зөрчил гаргаагүй" бол хугацаанаас нь өмнө суллаж, хяналт тогтооно гэж заасан.

Гэтэл Д.Мөнх-Эрдэнэ нь ийнхүү зөрчлийн арга хэмжээ авхуулсан тул магадлалаар суллагдах боломжгүй болоод байгаа гэдгийг эх сурвалж мэдээллээ. 

Учир нь 6.12 дугаар зүйлийн 1-д "Ялтан гэмт хэрэг үйлдэж учруулсан хохирлоо нөхөн төлж зан байдлаараа нийтэд аюулгүй болсноо нотлон харуулж ял эдлэх хугацаандаа ноцтой зөрчил гаргаагүй, оногдуулсан ялын дараах хувийг эдэлсэн бол прокурорын саналыг харгалзан шүүх хугацаанаас өмнө суллаж, хяналт тогтоохоор шийдвэрлэж болно" гэж заажээ.

Мөн хуулийн:

• 1.1.таван жил хүртэл хугацаагаар оногдуулсан хорих ялын хоёрны нэгээс доошгүй хувийг;

• 1.2.таван жилээс дээш арван хоёр жил хүртэл хугацаагаар оногдуулсан хорих ялын гуравны хоёроос доошгүй хувийг;

• 1.3.арван хоёр жилээс дээш хорин жил хүртэл хугацаагаар оногдуулсан хорих ялын дөрөвний гурваас доошгүй хувийг эдэлсэн бол гэж заасан байна.

гэж заажээ.