Монгол Улсын Соёлын Гавьяат зүтгэлтэн, жүжиг, киноны зохиолч Хоролын Зандраабайдийн мэндэлсний 90 жилийн ойд зориулсан "Бадмаарсан зул-Хоролын Зандраабайдий" хөрөг, дурсамжийн номын нээлт Монгол Улсын Үндэсний Номын Сангийн Төв байрны Уншлагын их танхимд болов."Бадмаарсан зул-Хоролын Зандраабайдий" номыг түүний гэргий хүүхдийн зохиолч Шаравын Энхбаяр эрхлэн хэвлүүлж, нээлтэд урлаг, утга зохиолын номын садан нөхөд, ахан дүүс, хамтран зүтгэгчид нь хүрэлцэн ирж оролцлоо.Х.Зандраабайдий зохиолч "Бадмаарсан зул" цувралыг 2006 оноос хойш 4 цувралыг эрхлэн хэвлүүлсэн бөгөөд энэ удаагийн түүний хөрөг дурсамжийн номыг өөрийнх нь цувралын нэрээр нэрлэн хэвлүүлжээ.Х.Зандраабайдий "Хонины найр", "Хөх ногооны униар", "Газрын жигүүр", "Гул Аранжин" киноны зохиол болон олон арван жүжиг, хүүрнэл зохиолын ном, сэтгүүл зүйн бүтээл хэвлүүлснээр нь уншигч олон бэлхнээ таних билээ.
