Ерөнхий аудитор С.Магнайсүрэнгээс төсвийн гүйцэтгэл хийсэн тайлангийн талаар тодрууллаа.

Тэрбээр “Бид наймдугаар сард хийх завсрын аудитдаа ач холбогдол өгч ажиллана. Өмнө гарсан дутагдлуудыг засах ёстой гэдэг чиглэл барина. 2024 онд аудитын шийдвэрээр гарчхаад байгаа асуудлуудыг 2025 оны тайланд давтах юм бол бид хатуу хариуцлага ярихаас өөр гарцгүй. Нэг алдааг олон давтах нь хариуцлагагүйн асуудал.

Үндэсний аудитын газраас жил бүр Засгийн газрын санхүүгийн тайланг нэгтгэж байгаа. Нийт 6900 гаруй байгууллагын тайланг нэгтгэдэг. Мөн жил бүр төсвийн гүйцэтгэлийн тайланг гаргадаг. Үүгээр бүх яам, салбар чиглэл бүрээр алдаа, дутагдал нь гараад нээлттэй байгаа.

Жил бүрийн аудитаар давтагдаад байгаа асуудал бий. Тиймээс үүнийг УИХ анхааралдаа авч, хэрэгжилтэд нь УИХ-ын хяналт, шалгалтын чиглэлийн бүтэц, нэгжийг давхар анхааруулж хяналтад нь оруулах шаардлагатай гэдгийг УИХ-д би танилцуулсан. Тэгэхгүй бол бид асуудлыг гаргаж тавиад байхад жил бүр давтагдаад байгаа асуудлууд байна. Жишээ нь, хадгаламж зээлийн хоршоо, дампуурсан банкны төлбөр барагдуулахтай холбоотой асуудал. Олон жилийн өмнө асуудал нь шийдэгдсэн ч манай тайланд жил бүр ороод ирдэг. Үүнд гарц, шийдэл олох нь зүйтэй.

Бид шалгаад зөрчлүүдийг ялгаад гаргаад ирдэг. Үүнээс эрүүгийн болон гэмт хэргийн шинжтэй байж болзошгүй асуудлууд анхаарал татдаг. Үүнийг материалжуулаад бид Улсын ерөнхий прокурорт шилжүүлдэг” гэв.