Сангийн сайд Б.Жавхлан, Боловсролын сайд П.Наранбаяр, ГБХНХ-ын сайд Т.Аубакир нар МБШУҮЭХ-ны дарга З.Цогтгэрэлтэй уулзаж байна.

Сангийн сайд Б.Жавхлан хэлэхдээ, "Засгийн газар нэгэнт өргөн барьсан төсөвт өөрчлөлт оруулах бол санал хурааж хуралдана. 

Өнөөдрийг хүртэл цалин тэтгэмж нэмээгүй биш нэмсэн. 23 хувиар нэмэгдүүлсэн.

Багш нарын цалинг ирэх нэгдүгээр сарын нэгнээс 20 хувь, долоодугаар сараас 10 хувиар нэмэх тооцоолол гарсан. Нийт 30 хувь нэмэгдэнэ. Бусад салбарт гэсэн төсөвт өөрчлөлт орж ачаалал нэмэгдэхээр байна. Цалинг 3.5 сая төгрөгт хүргэх ерөнхий тооцоолол ийм гарч байна. 

Манай нийт төрийн албан хаагч нарын цалин нь 7.8 их наяд төгрөг. Багш нарын цалинг 3.5 сая төгрөг болж нэмэгдвэл 3.3 их наяд төгрөгөөр нэмэгдэхээр байна.

Зөвхөн цалингийн фонд гэхэд л 6 их наяд төгрөг давах нь ээ.

Нөгөө талаас цалин хөлсний хэмжээ бол шууд хэрэглээнд нөлөөлдөг онцлогтой зардал байдаг. Инфляц нэмэгдэнэ. 

Монгол банкны тооцооллоор нэг их наяд төгрөгөөр нэмэгдэхэд хамгийн багадаа 1-1.5 хувиар инфляц нэмэгддэг. Шууд зардлаар нэмэгдвэл хоёр хувиар ч нэмэгддэг. 

Нэгэнт төсөв өргөн баригдсан тул урсгалаас урсгал руу шилжүүлэх нь ээ. Цаашдаа 2027, 2028 онуудад бол шууд зардал нэмэгдээд явна. 

Бид нэг талаас цалингаа нэмээд байгаа мөртлөө нөгөө талдаа эдийн засгийн бодит өсөлт буураад инфляц нэмэгдвэл цалин нэмсний үр дүн гарахгүй. Тэгэхээр энэ бүх тэнцвэрийг харж, тооцоолдог гэдгийг та бүхэн ойлгоорой" гэв.