Улаанбаатар төмөр замынхан Дархан-Уул аймгийн Дархан өртөөний нийт ашиглалтын 10 замын доогуур нүхэн гарц барьж, өнгөрсөн баасан гарагт ашиглалтад өглөө. Дарханы нүхэн гарц Монголд байхгүй, 116 метр урт бас энэхүү бүтээн байгуулалтыг гадаадын ямар нэг компаниар биш, манай төмөр замын ажилчид өөрсдийн гараар хийж бүтээсэн гэдгээрээ онцлог юм.  Аймгийн Засаг даргын санаачилгаар Улаанбаатар төмөр замын зам засварын машинт станцын зам, гүүрийн бригад гурван сарын дотор хийж гүйцэтгэсэн нүхэн гарц нь иргэдийн аюулгүй зорчих нөхцөлийг бүрдүүлж байгаа юм. Нүхэн гарцын нээлтэд Дархан-Уул аймгийн иргэд, Дархан зангилааны хамт олон, аймгийн Засаг даргын тамгын газрынхан, Улаанбаатар төмөр замын даргын үүрэг гүйцэтгэгч Г.Сэрээнэндорж нарын албаны хүн оролцсон юм.
Цугласан иргэд “Галт тэрэгний замаар хөндлөн гарах хүндхэн асуудлыг шийдэж өгсөнд талархаж байна” хэмээн ам сайтай байсан. Өмнө нь Дархан өртөөний эсрэг талд бараг айл байдаггүй байсан бол одоо айлууд олноор суурьшжээ. Тиймээс ажлаасаа гэр рүүгээ явахад, наад зах нь дэлгүүр ороход заавал төмөр замаар гарах хэрэг гардаг байсан нь ийн шийдэгдэж, өртөөний ажилчид ч амар тайван ажлаа хийх боломжтой болж байна.