Орон нутгийн санаачилгыг дэмжих Канад сангийн 2026–2027 оны төслийн нэгээр шалгарсан “Завхан аймгийн жендэрийн мэдрэмжтэй хяналт-шинжилгээ, үнэлгээний чадавхыг бэхжүүлэх” төслийн албан ёсны нээлтийг танхим, цахим хосолсон хэлбэрээр зохион байгууллаа.
Нээлтийн арга хэмжээнд Завхан аймгийн ЗДТГ, Хяналт-шинжилгээ, үнэлгээний хэлтэс, төсөлд хамрагдах оролцогчид болох 24 сум, 9 агентлаг болон орон нутгийн ТББ-ын төлөөлөл, төслийн зөвлөх нар оролцлоо.
Завхан аймгийн ЗДТГ-ын дарга Т. Рэнчинванжил, Монгол дахь Канадын сангийн менежер С.Мөнхзул нар төслийг албан ёсоор нээж, төсөл хэрэгжүүлэгч, оролцогч талуудад амжилт хүсч, хяналт-шинжилгээ үнэлгээний чадавхыг бэхжүүлэх, бодит үнэлгээний туршлага хуримтлуулах, хяналт-шинжилгээ үнэлгээний мэргэжлийн сүлжээ орон нутагт нэн чухал байгаа асуудлыг төслөөр хөндөж байгааг онцлон дурдлаа.
Завхан аймгийн ЗДТГ-ын Хяналт-шинжилгээ, үнэлгээний хэлтсийн дарга Н.Бямбадорж төслийн санаачлага, дэлгэрэнгүй танилцуулгаар мэдээлэл хийж, хэрэгжилтийн төлөвлөгөөг танилцуулж, оролцогчдын төлөөлөл сэтгэгдлээ илэрхийлэн нээлтийн үйл ажиллагаа өндөрлөлөө.
Завхан аймагт үнэлгээг өөрсдөө төлөвлөж, хэрэгжүүлж, үр дүнг нь бодлого болон шийдвэр гаргалтад ашиглах орон нутгийн тогтвортой чадавх бий болгох төслийн хэрэгжүүлэгчдэд амжилт хүсье.
#CFLI #CanadaFundForLocalInitiatives #Zavkhan #MonitoringAndEvaluation #GenderResponsiveEvaluation #ResultsBasedManagement #EvidenceBasedPolicy #LocalGovernance
