Нью-Йоркийн ерөнхий прокурорын газар Сэнди хар салхины дараа бараа бүтээгдэхүүний үнэ нэмэгдсэн талаарх олон мянган гомдлын мөрөөр шалгалт хийж эхэлжээ. Ялангуяа бензин шатахууны үнэ, хүмүүсийн онц чухал хэрэгцээтэй зүйлс тухайлбал цахилгаан генератор, зочид буудлын үнэ хэрхэн нэмэгдсэн талаар хэдэн зуун гомдол ирсэн байна. Энэ талаар Нью-Йоркийн ерөнхий прокурор Шнайдермэн мэдэгдэхдээ “Зах зээл ийм тогтворгүй байхад хүмүүс, айл гэрт амин чухал хэрэгцээтэй байгаа зүйлсийг хэтрүүлсэн үнээр зарах ухаангүй явдлыг зөвшөөрөхгүй. Нью-Йоркийн оршин суугчид амьдралаа эргэн босгох гэж хичээж байгаа энэ үед ашиг хонжоо хайсан хүмүүсийн үйлдлийг таслан зогсооно” гэжээ.  
Хар салхи, үерийн гамшигт ихээр нэрвэгдсэн Нью-Йорк хот гамшгийн дараах сэргээн босголт, тусламж үйлчилгээ, их цэвэрлэгээнд одоогийн байдлаар 85,4 сая ам.доллар зарцуулаад байна.  Гамшгийн үеэр сонгуулийн санал хураах байрууд эвдэрч сүйдсэн учир явуулын майхан ашиглахаар болсны зэрэгцээ хотын оршин суугчид заавал бүртгүүлсэн хэсэгтээ бус хотын аль ч санал хураах байранд очиж, саналаа өгч болохоор болжээ.