Дэлхийн хамгийн өндөр барилга хэдхэн сарын дараа урд хөршид сүндэрлэн босох нь. Хятадын Тогтвортой барилга корпорацын мэдэгдэж буйгаар тус улсын зүүн өмнөд хэсгийн Хунан мужийн Чанша хотод 220 давхар барилга барихаар төлөвлөж буй бөгөөд хамгийн сонирхолтой нь нэгдүгээр сараас эхлэх барилгын ажлыг 90 хоногийн дотор гүйцэтгэнэ гэж төслийг хэрэгжүүлэгчид амлаж байна. Энэ нь өдөрт л таван давхрыг барина гэсэн үг юм. Үүгээрээ хятадууд нэгдүгээрт дэлхийн хамгийн өндөр барилга гэсэн рекордыг эвдэх, хоёрдугаарт хамгийн хурдан барьсан гэдгээрээ дэлхий нийтийн анхаарлыг татах зорилготой ажээ.
“Тэнгэрийн хот” нэртэй эл барилга өнөөдрийн байдлаар дэлхийн хамгийн өндөр барилга гэгдэж буй Дубайн Бурж Халифагаас 10 метрээр өндөр байх ажээ. Мөн барилгын ажлын гүйцэтгэлээрээ Бурж Халифагаас даруй 24 дахин хурдах байх юм. Энэхүү аварга том барилга дотор 30 мянган хүн амьдрах багтаамжтай орон сууц, сургууль, эмнэлэг байхын зэрэгцээ дээвэр дээрээ нисдэг тэрэг буухад зориулсан 17 талбайтай байх аж.  
Энэхүү барилгын ажлыг “Broad” хэмээх маш хурдан хугацаанд барилга барьдгаараа алдартай компани гүйцэтгэх гэнэ. Тэд 15 давхар барилгыг ердөө хоёр хоногийн дотор, 30 давхар барилгыг 15 хоногийн дотор барьж байсан туршлагатай. Тэд жирийн барилгыг бодвол арай бага цемент, цутгамал, арай бага ган төмөр ашигладаг гэнэ.
Тэгэхээр энэ барилга лав чанаргүй эд болно гэж шүүмжлэх хүн байгаа ч компаний удирдлагын зүгээс “Тэнгэрийн хот” 9,0 магнитудын хүчтэй газар хөдлөлтийг ч тэсвэрлэх болно хэмээн амлаж байна.
Дэлхий нийтэд гайхамшгийг мэдрүүлнэ хэмээж буй уг барилгыг суурийг энэ сарын сүүлчээр цутгаж эхлэх ажээ.