Америкийн сансар судлалын төв НАСА-гийн эрдэмтэд ирэх арванхоёрдугаар сард ертөнцийн мөхөл болохгүй гэдэгт итгэлтэй байна. “Манай дэлхий дөрвөн тэрбум жилийн настай. Тэгээд ч ертөнцийн мөхөл болох шинжлэх ухааны ямар ч үндэслэл байхгүй” гэж тус албаны сайтад тэмдэглэсэн байна. “Үзмэрч, зөн билэгчид гээд янз бүрийн хүмүүс манай дэлхий Нибуру гэгч гаригтай мөргөлдөнө гээд байгаа, гэхдээ энэ аймшигт ослыг 2003 оны тавдугаар сард болно  гэж байсан. Одоо болохоор арванхоёрдугаар сарын 21-нд болно гэж байна. Энэ бол зүгээр л Майяачуудын нэг хуанлийн нэг мөчлөгийн төгсгөлийн өдөр гэжээ. Энэ бол ертөнц мөхөх шалтгаан биш. Арванхоёрдугаар сарын 31-нд танай гэр дэх хуанлийн хуудас дууссанаар цаг хугацаа  дуусчихгүй. Үүнтэй адил майяачуудын тоолол бүхэлдээ 2012 оны арванхоёрдугаар сарын 21-нд дуусч байгаа юм биш.  Энэ өдөр бол тэдний тооллоор хамгийн сүүлд үргэлжилсэн нэг хэсэг мөчлөг нь л дуусч, дараагийн үе нь эхэлж байгаа хэрэг. Яг л танай гэр дэх хуучин оны хуанли дуусаад шинэ хуанли нэгдүгээр сарын 1 гээд эхэлдэгтэй адил” гэж НАСА-гийн эрдэмтэд бичжээ.
Судлаачид бас ертөнцийн төгсгөлийн тухай, өөр гаригтай мөргөлдөнө, наран дээрх их дэлбэрэлт, гариг эрхсийн парадын үеэр дэлхийн тэнхлэг өөрчлөгдөнө гэсэн цуу яриануудыг үгүйсгэсэн байна. Өнөөдөр Нар болон сансрын биетүүд судалдаг НАСА-гийн эрдэмтэд, одон орон судлаачид, одон орны биологчид, Google-ийн видео чатаар сонирхсон хүмүүст “ертөнцийн төгсгөл”-ийн тухай тодорхой мэдээлэл өгөх юм байна.