Америкийн 120 гаруй мянган иргэн АНУ-ын Засаг захиргаанд хүсэлт гаргаж зэвсгийн чөлөөт худалдааг хязгаарлах арга хэмжээ авахыг шаардан гарын үсэг цуглуулж байна. АНУ-ын засаг захиргааны дүрмээр бол хамгийн багадаа 25 мянган гарын үсэг цуглуулбал тухайн асуудлыг ерөнхийлөгчийн аппарат авч үздэг юм байна. Долоо хоног бүр л сүм, худалдааны төв, сургуульд галт зэвсэг хэрэглэсэн халдлага болж байгаад эмзэглэсэн иргэд ийм санал дэвшүүлэхэд хүрсэн байна.
Хамгийн сүүлд өнгөрсөн баасан гаригт 20 настай этгээд бага сургуульд гал нээж 27 хүний амь бүрэлгэсний 20 нь 6-7 настай хүүхэд байсан юм. Гэмт хэрэгтэн өөрийнхөө нэр дээр бүртгэлтэй автомат винтов, хоёр гар буугаар энэ хэргийг үйлдсэн юм.
Эрх баригчид болохоор асуудлыг заавал яаран шийдэх гэлгүйгээр эхлээд нухацтай ярилцаж хэлэлцэх ёстой гэж үзэж байна. Ерөнхийлөгч Барак Обама үүний өмнө зэвсгийн асуудлыг гарцаагүй шийдэх ёстой гэж байсан бол Цагаан ордны хэвлэлийн нарийн бичгийн дарга Жей Карни “энэ бол өнөөдрийн асуудал биш” гэж тэмдэглэж байсан юм.
