Оскарын шагнал хүртэх нь кино уран бүтээлчдийн хувьд нэр хүнд авчраад зогсохгүй эдийн засгийн хувьд ч ихээхэн ашиг дагуулдаг байна. Кино мэргэжилтнүүдийн судлан тогтоосноор найруулагч нь Оскар хүртсэн киноны “box-office”-ын орлого 11 сая ам.доллараар нэмэгддэг байна. Өөрөөр хэлбэл Оскарын шагналтай найруулагчийн бүтээл рүү үзэгчид хошуурч, орлого нь ийм хэмжээгээр өсдөг гэсэн үг. Тэгвэл эмэгтэй гол дүр нь  Оскарын эзэн болсон киноны  орлого 2,3 сая ам.доллараар нэмэгддэг байна. Харин эрэгтэй гол дүр нь Оскар хүртэхэд орлого нэг сая ам.доллараар л өсдөг гэнэ. Тэгвэл туслах эрэгтэй, эмэгтэй дүрийн жүжигчин нь шагнал хүртлээ гэхэд орлого ашигт огтхон нөлөө үзүүлдэггүй байна. Харин шилдэг монтаж эвлүүлэг гэх мэт техникийн төрлийн номинацад тэргүүлвэл үзэгчдийг эргүүлэн татаж, орлого ашиг нь даруй 10 гаруй сая ам.доллараар өсдөг байна. Тэгэхээр Оскарын шагнал хүртэх нь кино уран бүтээлчдийн хувьд нэр хүндээ ч өсгөх басхүү орлогоо ч ахиулах нэг том шат болдог ажээ.