Булган аймгийн цагдаагийн хэлтсийн ажилтнууд банк, ломбард, дэлгүүрээс эд зүйл хулгайлдаг бүлэг хулгайчийг баривчилжээ. Сэлэнгэ аймгийн Сайхан сумын харьяат Номгон тосгонд оршин суудаг Н, Б, Х нар нь хамтарч Сэлэнгэ аймгийн Цагаан толгой, Өвөрхангай аймгийн Арвайхээр суманд байрлах дэлгүүр болон Орхон аймгийн Хүнсний дэлгүүр, ломбардаас электрон бараа, алт, үнэт эдлэл, архи, гутал хувцас, тамхи, гоо сайхны бараа зэрэг эд зүйл хулгайлж иргэдэд онц их хэмжээний хохирол учруулсан байна. Тэд хамгийн сүүлд Сэлэнгэ аймгийн Баянхараат, Булган аймгийн Дашинчилэн сумын банкинд хууль бусаар нэвтэрч, мөнгө хулгайлсан гэнэ. Цагдаагийнхны хэлснээр мөрдөн байцаалтын явцад 10 гаруй үйлдлээр хулгай хийсэн нь тогтоогджээ. Хэргийг Булган аймгийн цагдаагийн газар үргэлжлүүлэн шалгаж байна.