УИХ-ын дарга С.Бямбацогт "Инфляц огцом өссөн энэ үед төр бүсээ чангалах, төсвийн урсгал зардлаас 1,4 их наяд төгрөгийг танаж иргэдийн орлого, амжиргааг хамгаалах, эрчим хүчний бэлтгэлийг хангах, үнийн өсөлтөөс сэргийлэх арга хэмжээнд зарцуулах боломж олгох зохицуулалтыг өргөн барьсныг баталлаа. 

Өнөөдөр баталсан төсвийн тодотголын онцлох зохицуулалтаас дурдвал:

• Тэтгэврийн нэмэгдэл 2027 оны 1 сарын 1-нээс байсныг наашлуулж ирэх 11-р сарын 1-нээс эхэлнэ Ингэхдээ 435 мянган ахмадын суурь тэтгэвэр ₮100-₮300 мянгаар нэмэгдэнэ. 
• Салбар хоорондын цалингийн зөрүүг арилгаж, цалингийн өсөлтийг 50 хувьд хүргэж нэмэгдүүлж жигдрүүлнэ. Эрүүл мэндийн  салбарынхан 20 хувь, цаг уур, соёл спортын салбарынхны цалин 50 хувь тус тус нэмэгдэнэ. 
• Эрчим хүчний салбарын тухайд, иргэд айл өрхийн халаалт, цахилгааны үнийг нэмэхгүй байж, үүнийг шийдэхэд 180 тэрбум төгрөгийг батлахаар болсон.
• Инфляцид нөлөөлж байгаа мах, хүнсний ногооны үнийг тогтвортой байлгахад зориулж  140 тэрбум төгрөгийг тодотголд суулгасан.
• Шатахууны гаалийн татварыг тэглэснээ үргэлжлүүлнэ. 
• Хөгжлийн бэрхшээлтэй иргэдийн нийгмийн хамгааллын тэтгэвэр 26 хувиар нэмэгдэж сард 600 мянган төгрөг болж, асаргааны тэтгэмж 370 мянган төгрөг болж байна. Давхардсан тоогоор 170 мянган иргэн хамрагдана" гэлээ. 

14:23

УИХ-ын чуулганы нэгдсэн хуралдаан үргэлжилж байна. Өнөөдөр дараах асуудлыг хэлэлцэнэ.

• Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл /Засгийн газар 2026.08.20-ны өдөр өргөн мэдүүлсэн, дөрөв дэх хэлэлцүүлэг/
• Монгол Улсын 2026 оны төсвийн тухай хуульд өөрчлөлт оруулах тухай, Үндэсний баялгийн сангийн 2026 оны төсвийн тухай хуульд өөрчлөлт оруулах тухай, Нийгмийн даатгалын сангийн 2026 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2026 оны төсвийн тухай хуульд өөрчлөлт оруулах тухай хуулийн төслүүд /Засгийн газар 2026.08.20-ны өдөр өргөн мэдүүлсэн, тав дахь хэлэлцүүлэг/
• “Монгол Улсын 2026 оны төсвийн тухай хуульд өөрчлөлт оруулах тухай хууль баталсантай холбогдуулан авах зарим арга хэмжээний тухай” Улсын Их Хурлын тогтоолын төсөл /Монгол Улсын 2026 оны төсвийн тухай хуульд өөрчлөлт оруулах тухай хуулийн төсөлтэй холбогдуулан боловсруулсан, анхны хэлэлцүүлэг, асуулт асуух хугацаа 60 минут/
• Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүд /УИХ-ын гишүүн Ж.Бат-Эрдэнэ, Д.Энхтүвшин, Х.Тэмүүжин, Х.Баасанжаргал нарын гишүүд өргөн мэдүүлсэн, нэгтгэсэн төсөл, анхны хэлэлцүүлэг, асуулт асуух хугацаа 60 минут/
• Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /УИХ-ын гишүүн Ж.Бат-Эрдэнэ, Д.Энхтүвшин, Х.Тэмүүжин, Д.Цогтбаатар, Х.Баасанжаргал нарын гишүүд өргөн мэдүүлсэн, нэгтгэсэн төсөл, анхны хэлэлцүүлэг, асуулт асуух хугацаа 60 минут/
• Монгол Улсын Их Хурлын хяналт шалгалтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүд /УИХ-ын гишүүн Ж.Бат-Эрдэнэ, Х.Тэмүүжин нарын гишүүд өргөн мэдүүлсэн, нэгтгэсэн төсөл, анхны хэлэлцүүлэг, асуулт асуух хугацаа 60 минут/