Өмнөд Солонгосын шинэ Ерөнхийлөгч Пак Кын Хе нэгэн шинэ хууль санаачлан, Засгийн газраар батлуулсан нь олон нийтийн гайхширлыг төрүүлээд байна. Хуулийн нарийн зүйл заалт нь тодорхой болоогүй байгаа ч ерөнхийдөө энэ хуулиар хэт ил задгай хувцаслахыг хориглох гэнэ. Үүнд солонгос охидын өмсөх дуртай богино банзал ч орж мэднэ гэсэн мэдээлэл тараад байна.  Хэрэв энэ үнэн бол Өмнөд Солонгост дарангуйллын нийгэм эргэн тогтох нь гэсэн шүүмжлэл поп оддоос эхлээд жирийн иргэдээс ч гарч байна. Зарим од Твиттер хуудсаараа дамжуулан эсэргүүцлээ илэрхийлж байна. Тэд Ерөнхийлөгч Пак Кын Хег дарангуйлагч эцэг шигээ хүний хувцаслалтыг хүртэл зохицуулах гэж оролдож байна хэмээн буруутгажээ. Харин цагдаагийн газраас нийгэмд тараад байгаа энэ мэдээлэл ташаарал гээд дээрх хууль хүмүүсийн ямар хувцас өмсөх эсэхтэй огтхон ч хамаагүй, зөвхөн олон нийтийн газарт нүцгэлэх явдлыг зохицуулах хууль гэж тайлбарлаж байна. Ямартай ч, удахгүй хэрэгжих хуулийн тухай мэдээллээр бол олон нийтийн газар ил задгай хувцасласан тохиолдолд 50 мянган воноор торгох тухай заалт байгаа гэнэ.