Евро бүсийн Сангийн сайд нар хуралдаад Кипр улсад 10 тэрбум ам.долларын зээл олгохоор тохиролцжээ. Хэрэв тус улсын банкуудад өнөөдрийн дотор мөнгөний асуудлыг нь шийдэж өгөхгүй бол дампуурахдаа тулаад байсан юм. Ямартай ч, зээл олгохоор болсноор Киприйн эдийн засагт үүсээд байсан тодорхойгүй байдал төгсгөл болно гэж Евро бүсийн Сангийн сайд нарын Еврогруппийн Ерөнхийлөгч Жероен Дижсселблом мэдэгдлээ.
Кипрт өгөхөөр болсон 10 тэрбумын зээлийн дагалдах нөхцөл өмнө нь санал болгож байсан 12 тэрбумын зээлээс харьцангуй өөр юм. Өмнөх зээлийн нөхцлөөр Киприйн банкны салбарыг бүхэлд нь хамарч, асуудлыг нь шийдэх байсан бол энэ удаагийн зээл зөвхөн санхүүгийн хүнд бэрхшээлд орсон хоёр банкинд л хамаарах юм.
Киприйн Ерөнхийлөгч энэ зээлийг авах гэж Европын төв банк, Олон улсын валютын сан, Европын холбооны удирдагчидтай тун хэцүү хэлэлцээрт орсон гэж тус улсын хэвлэлүүд мэдээлж байна. Хэлэлцээрийн уур амьсгал зарим үед хурцдаж, Ерөнхийлөгч Никос Анастасиадес Европын холбооны төлөөлөгчдөд “Та нар намайг огцруулахыг хүсээ юу. Би та нарт нэг санал тавилаа. Зөвшөөрсөнгүй. Дахин өөр санал тавилаа. Бас л зөвшөөрсөнгүй. Та нар надаас өөр юу хүсээ вэ” хэмээн асуусан гэх.
Одоогоор Киприйн банз санхүүгийн нөхцөл байдал сайнгүй хэвээр л байна. Хадгаламж эзэмшигчид мөнгөө их хэмжээгээр татан авахаас сэргийлж,бэлэн мөнгөний машинаас нэг өдөр авах мөнгөний хэмжээг 120 еврогоор хязгаарлаж байна.