Хятадын Шанхай хотын захаар ачаа тээврийн чингэлэгт амьдардаг хэдэн арван гэр бүл бий.  23 сая хүн амтай тус хотод орон сууцны хүрэлцээ гэдэг бэл бэнчин муутай нэгэнд өдрийн од шиг ховор тул халуунд халуун, хүйтэнд хүйтэн төмөр чингэлэгт толгой хоргодоход хүрсэн айлууд олон байдаг аж. Тэд орон гэр нь болсон энэ чингэлгээ худалдан авсан ч юм биш, бүр сарын 500 юаниар түрээсэлж  суудаг байна. Их хөлийн газар ажил төрөл хийхээр холын муж, хөдөө нутгаас зорин ирсэн айлууд эцэстээ ийнхүү амжилт эс олж хотын захаар ядруухан аж төрөх нь элбэг. Эдгээр чингэлгийг түрээсэлдэг газрын эзэн нь чингэлгээ вакум хаалга, цонхтой болгож, ус, цахилгаантай ч холбож өгчээ. Гэвч 15-хан метр квадрат чингэлэгт гэр бүлээрээ, үр хүүхэдтэйгээ багтаж шингэж амьдрахад хэцүү. Харин оршин суугчид нь үүндээ төдий л гомдоллоод байдаггүй. Амьдрахын хажуугаар бяцхан дэлгүүр, үйлчилгээний цэг болгон ашиглах нь ч байдаг аж.