Баянхонгор сумын нэгдүгээр багийн нутаг дэвсгэрт байрлах “Дэлгэрэх” хүнсний захын орчимд иргэн Г нь мөнгөн усаар бариулсан алтыг хайлуулж орчныг бохирдуулж байсныг холбогдох газруудаас илрүүлсэн.
МХЕГ-ын Нэгдсэн төв лабораторийн ахлах шинжээч объектийн ойр орчмын 0-130 метр зайд 12 цэгээс хөрсний дээж, 8 цэгт агаарын сорьц дээж авчээ. Мөн бохирдсон хэсгийн 9.6 ам.метр талбайн хөрсийг хуулсны дараа уг талбайгаас хөрсний дээжийг конвертийн цуглуулах аргаар 15 см гүнээс нэг дээж авч шинжилсэн байна.
Шинжилгээний дүнгээр хөрснөөс авсан 12 дээжний 1-8 хүртэлх сорьцонд мөнгөн усны агууламж стандартад заасан зөвшөөрөгдөх дээд хэмжээнээс хэтрээгүй байна. 9-12 хүртэлх сорьцонд мөнгөн усны агууламж зөвшөөрөгдөх дээд хэмжээнээс 4-5 дахин их үзүүлэлтээр бохирдсон нь тогтоогджээ. Агаарын сорьцуудын бохирдол стандартад заасан хэмжээнээс хэтрээгүй байна. Бохирдсон хөрсийг хуулсны дараа авсан нэг дээж сорьцонд мөнгөн усны агууламж стандартад заасан хэмжээнээс хэтрээгүй байна. ОБЕГ-ын Ариутгал халдваргүйжүүлэлтийн бүлэг иргэн Г-ийн 2х4.8 метр талбайтай объектын өрөө, хөрс, гадна хана, дээвэр зэрэг нийт 35 ам.метр талбайг саармагжуулж хөрс, агаараас дахин дээж авч шинжлэхэд сорьц зөвшөөрөгдөх хэмжээнд гарчээ. Саармагжуулах явцдаа объект дотор дэвссэн шалны хулдаас, хананы завсар буланд жижиг дусал хэлбэрээр тархсан мөнгөн усныг цуглуулж авсан байна. Дээврийн хэсгийн дулаалгын материал, шалны хулдаас, агааржуулалтын хоолойг бөглөж байсан бохирдолтой эд зүйлийг цуглуулж битүүмжлэн, заримыг зориулалтын бодисоор саармагжуулжээ.