“Түмэн шувуут” компанийн 18330 толгой тахиа энэ сарын 5-ны өдөр үхсэн хэмээн мэдээлэл цацагдсан. Мал эмнэлэг, үржлийн газар, Мэргэжлийн хяналтын ерөнхий газар, Нийслэлийн МХГ-ын хамтарсан ажлын хэсэг газар дээр нь ажиллаж, шувууны томуу, нъюкасл өвчин илрүүлэх түргэн тестийн шинжилгээ хийхэд уг өвчин илрээгүй гэнэ.
Урьдчилсан байдлаар тус байранд агааржуулагч системийн гэмтлийн улмаас тэнд байсан тахиа хүчилтөрөгчийн дутагдалд орж олноор үхсэн байж болзошгүй гэж ажлын хэсэг үзэж байна. Ямартай ч, УМЭАЦТЛ-т явуулсан дээж, материалын шинжилгээгээр шувууны томуу өвчин биш болох нь батлагдсан. Тиймээс хорооны Засаг даргын захирамжаар байгуулагдсан ажлын хэсэг 18330 толгой үхсэн тахиаг устгаж, ариутгал халдваргүйжүүлэлт хийжээ. Харин иргэдийг шувуу үхсэн байвал яаралтай холбогдох газарт мэдэгдэж байхыг анхаарууллаа.