Өнгөрсөн жилийн өдийд Нью-Йоркт дуудлагаар худалдагдах шахсан Тираннозавр батаарыг Монголын өмч, ийм динозаврын яс зөвхөн Монголоос л олддог гэдгийг батлахад үнэтэй хувь нэмэр оруулсан Канадын палеонтологич Филипп Карри Алтангадас одонгоор шагнуулаад байх үед нь ярилцлаа.
 

-Өндөр нэр хүндтэй шагнал хүртсэн танд баяр хүргэе. Та энэхүү динозаврын яс Тираннозавр батаарынх, ийм яс зөвхөн Монголын говиос л олддог гэдгийг баталсан гол эрдэмтэн. Та энэ ясыг чухам ямар шинж тэмдгээр нь Монголын говиос олддог Тираннозавр батаарынх гэж баталснаа ярихгүй юу?
-Би тираннозавр батаарын судалгаан дээр олон жил ажилласан хүн. Олон төрлийн динозаврын яс тэр дундаа тираннозавртай төрөл ойр Т-рексийг судалж байсан. Ер нь тираннозавр батаар анатомийн хувьд бусад динозавраасаа ялгаатай. Анатомийн бүтцийг нь харахад өөр байдаг. Тираннозавр батаарын ясны өнгө, түүний хадгалагдсан байдлыг харахад Монголын говиос олдсон гэдгийг батлах тодорхой ул мөр бий.

-Тираннозавр батаарыг зөвхөн Монголын говиос л олддог гэдэг. Өөр бусад газраас олдох боломжгүй юу?
-Тийм ээ. Тарбозаврын яс олдсон цорын ганц нутаг дэвсгэр бол Монголын говь. Мэдээж тэр дундаа Монголын өмнийн говиос л олдож байсан. Өмнөговьтой хил залгаа, маш ойр орших Хятадын газар нутгаас ч тарбозаврын яс олдоогүй юм.

-Тираннозавр батаар бусад динозавруудаасаа юугаараа ялгаатай вэ. Онцлог шинжийг нь хэлж өгөхгүй юү?
-Анатомийн бүтцээрээ бусад динозавраас ялгардаг. Тухайлбал, урд хоёр гар  нь маш богино. Ер нь, тираннозавр батаар Т-рексээс ч жижигхэн биетэй байдаг. Үүнээс гадна гавлын яснаас эхлээд зарим ясных нь хэлбэр, хэмжээнээс хамаарч тираннозавр батаар гэдгийг нь тогтоож болно.