Гадаад харилцааны яамны Консулын газрын дарга Ш.Сүхбаатараас цөөн асуултад хариу авлаа.

-Манай улсын хэчнээ иргэн гадаадын улс орнуудад ял эдэлж байна вэ. Гадаад харилцааны яам тодорхой судалгаа хийсэн үү?
-Өнөөдрийн байдлаар 16 оронд 159 хүн ял эдэлж байгаа. Ял эдэлж байгаа хүмүүстэйгээ консулын газраас уулзаж, ар гэртэй нь уулзуулах ажлыг зохион байгуулсан.

-БНСУ-д ажил хөдөлмөр эрхлэхээр яваад ор сураггүй болсон гэх хүмүүсийг хайж байсан. Ар гэрийнхэн нь албан ёсоор хүсэлт тавьсны дагуу хайж байгаа гэсэн. Иргэдийг олсон уу?
-Солонгост алга болсон 29 иргэнээс 12 нь олдсон. Тэр хүмүүс энэ жил алга болоогүй. 1990 оноос хойш БНСУ-д зорчсон иргэдийн бүртгэлийг сайжруулахад ирэхээр сураггүй алга болсон иргэний 9 нь монголдоо ажиллаж амьдарч байна гэдэг нь илэрсэн. Цаашид бусад нь илрэх байх аа.

-Буяндэлгэр гэдэг хүнийг авчрах гэж байгаа гэсэн. Энэ тухай мэдээлэл өгөөч?
-Балбад дөрвөн жилийн ял эдлэхээр байсан Буяндэлгэрийг Гадаад байгаа иргэдэд туслах сангаас зардлыг нь гаргаад энэ сарын 11-нд Улаанбаатарт авчирхаар болоод байна. Мөн Оюунчимэг гэдэг иргэн ОХУ-д хууль зөрчсөн хэргээр ял эдлэх гэж байсныг авчирч байна. Өнгөрсөн долоо хоногт Эрээнд манай улсын иргэнийг БНХАУ-ын Хилийн цэрэг зодсон. Энэ асуудалд манай консулын газрынхан шуурхай ажиллаж, зодуулсан иргэний эмчилгээний зардалд 30 мянган юанийг буруутай талаас гаргуулсан.

-Гадаад ял эдэлж байгаа иргэд ихэвчлэн ямар төрлийн гэмт хэрэг үйлдээд байна вэ?
-Иргэдийн хувьд ихэвчлэн хулгайн хэрэг үйлдэж байна. Үүнээс гадна хар тамхины хэрэгт 34 хүн ял эдэлж байна. Олонхи нь БНХАУ-д ял эдэлж байгаа.