Жендерийн тэгш эрхийн тухайд сонсоогүй хүн байхгүй биз. Манай улс гэхэд л УИХ-д заавал байх ёстой эмэгтэй гишүүдийн квотыг тогтоосон. Энэ талаар хүний эрх, түүний дотор эмэгтэйчүүдийн эрхийг дээдэлдэг бусад оронд ч идэвхтэй ажиллаж байна. Тухайлбал, Засгийн газарт нь алба хашдаг эмэгтэй сайдуудын тоогоор өнөөдөр Норвеги улс дэлхийд тэргүүлдэг. Ер нь, Европ жендерийн тэгш байдлын асуудлыг шийдэхэд толгой цохидог. Өчигдөрхөн Германы Гамбург хот нэгэн хууль батлахаар болсон нь үүний тод жишээ. Шинэ хуулийн дагуу тус хотод үйл ажиллагаа явуулдаг улсын мэдлийн 130 хороо, албанд аль нэг хүйсийн ажилтнуудын тоо нь 60 хувиас хэтрэхгүй байхаар болов. Одоогоор Гамбуруг хотын улсын албаны ажилтнуудын дундахь эмэгтэйчүүдийн тоо 30 хувь орчим байгаа аж. Гэхдээ хууль батлагдлаа гээд эрэгтэйчүүдийг бөөнөөр нь ажлаас халахгүй. Зөвхөн шинээр ажилтан албанд авахдаа л хуулийн дагуу квотыг баримтлахын тулд хүйсийг харгалзах ажээ. Түүнчлэн квотын шаардлагад нийцэхгүй байсан ч хосгүй чадвартай, туршлагатай хүн байвал хүйс харгалзахгүй авна гэдгийг хууль санаачлагчид онцлов.
Хуулийг батлах санал хураалт намар болох ч иргэдийн төлөөлөлд хууль санаачлагчдын нам олонхи байгаа болохоор гарцаагүй батлагдана гэдэгт итгэлтэй байна.