Дуучин Мадонна өсвөр насны хоёр хүүхэдтэйгээр хэрхэн харилцах учраа олох гэж амаргүй даваатай тулгарч буйгаа саяхан "Good Morning America" нэвтрүүлэгт ярилцлага өгөх үеэрээ ярьжээ. Түүний том охин Лурдес одоо 16 настай бол том хүү Рокко нь 12 хүрч байгаа юм. Тэд хоёулаа ээжтэйгээ хамтран ажиллаж, аялан тоглолтоор явахад нь Лурдес бүжигчдийн хувцас хэрэглэлийг хариуцаж, харин хүү нь брэк бүжгийн номер үзүүлж, заримдаа DJ хийх ч үе гардаг. 
Мадонна охиндоо iphone авч өгснөөс хойш Лурдес утаснаасаа салахаа байж, ээжтэйгээ бараг дуугарахаа больсон бол өсвөр насны хүү нь охид руу нүд унагаад болохоо больжээ.

Хэдийгээр Мадонна чөлөөтэй сэтгэлгээгээрээ заримдаа олныг ч алмайруулдаг хүн боловч хүүхдүүдээ жирийн л хүүхэд шиг томоотой, ёс журамтай хүн болгон хүмүүжүүлэхийг хүсдэг учир тэдэнтэй яаж харилцах учраа олох вэ гэж бодоод заримаа толгойгоо гашилгахад хүрч байна хэмээн ярьжээ.