Өмнөд Африкийн БНУ-ын Ерөнхийлөгч асан Нелсон Манделагийн биеийн байдал маш хүнд байгаа тухайн одоогийн төрийн тэргүүн Жэкоб Зума түүнийг эмнэлэгт эргэж очсоныхоо дараа мэдэгдсэн байна. Он гарснаас хойш уушигны халдвар өвчнөөр гурав дахь удаа эмнэлэгт хэвтэж буй Н.Манделагийн бие сүүлийн 24 цагт бүр дордоод байгааг эмч нар нь хэлжээ. Өдгөө 94 нас сүүдэр зооглосон Н.Манделаг эрүүл саруул болж, урт удаа наслахыг хүссэн Өмнөд Африкийн иргэд сүүлийн хэдэн өдөр түүний төлөө олноороо залбирцгааж байгаа юм. Арьсны өнгөөс үл хамааран улс орондоо ижил тэгш эрхтэйгээр амьдрахын төлөө олон арван жил тэмцэж,  27 жилийг шоронд өнгөрүүлсэн Н.Мандела хорихын хүнд нөхцолд эрүүл мэндээрээ асар их хохирсон нь өдгөө өтөл насанд нь ийнхүү зовоосоор байна.