АНУ-ын Аризона мужийн Ярнелл хотод гарсан гал түймэрт 19 гал сөнөөгч амь насаа алдаад байна. Өнгөрсөн баасан гаригт аянга буусны улмаас үүссэн гал маш хурдан тархаж, ойр хавийн газар нутгийг түймэрдэж, 200 гаруй айлын байшин шатаж, орон гэргүй болгоод байна. Аризонад сүүлийн өдрүүдэд маш халуун, чийгшил багатай, ширүүн салхитай байгаагаас гал түймрийг унтраахад маш хүнд байгаа юм. Зарим газар нутагт температурын хэм бүр 54 градус хүртэл халж байгаа мэдээ байна. Хэт халуун гал сөнөөгчдийг ч ажиллах аргагүй болгож, тэд өөрсдийгөө хамгаалахын тулд аль болох гүн нүх ухаж, шатдаггүй материалаар өөрсдийгөө бүтээж байгаа аж. Гэвч нас барсан гал сөнөөгчдийг олох үед хэт халууны улмаас тэд бүтээлэг дороо амьсгал хураасан байжээ. Амь насаа алдсан гал сөнөөгчдийн араас эмгэнэн гашуудаж буйгаа АНУ-ын Ерөнхийлөгч Б.Обама мэдэгдээд тэд бол ард иргэдийн амь нас, эд хөрөнгийг аюулаас хамгаалахын тулд өөрсдийн амиа өгсөн баатрууд хэмээн нэрлэсэн байна.
Одоогоор түймрийг унтраахаар 200 гаруй гал сөнөөгч ажиллаж байгаа юм.