Латин Америкт ижил хүйст­нүүд хоорондын гэрлэл­тийг албан ёсоор хүлээн зөв­шөөрсөн гурав дахь улсаар Коста-Рика тодорлоо. Гэхдээ энэ өөрчлөлт нь Коста-Рикагийн парламентын гишүүд шинэлэг, либераль үзэлтэйгээс биш харин тэдний бичиг үсэг сайн тайлагдаагүйгээс болсон гэнэ. Тус улсын парламентын гишүүдийн дийлэнх нь бат­луулахаар оруулж ирсэн багц хуулийг бараг уншаагүй. Унш­сан хэд нь  ижил хүйст­нүүдийн гэрлэлтийг батлах бо­ломж олгосон өөрчлөлт оруул­сан гэдгээ өөрсдөө ч анзааралгүйгээр хэд хэдэн өгүүлбэр өөрчилсөн байжээ.
Ингээд багц хуулиа бат­луулж гарын үсэг зуруулахаар Ерөн­хийлөгч Лауре Чинчилье руу явуулсны хойно сонин хэвлэлээр дуулиан дэгдэж эхлэхэд ямар гээчийн бантан хутгаснаа ойлгосон гэнэ. Тэгээд Ерөнхийлөгчид хандан хуулинд хориг тавих эрхээ ашиглан буцаахыг уриалтал Ерөнхийлөгч эрс татгалзсан төдийгүй “Бид ямагт урагшилж явах ёстой болохоор энэ хуулийг батална” гэсэн юм байх.Үүний дараагаар тус ул­сын сонин хэвлэлээр пар­ла­ментын гишүүдийн бичиг үсэг, боловсролын төвшин, ажилдаа хандах хандлагыг эрс шүүмжлэх болов. Тухайлбал, “The Costarican Times” сонин “Батлаж байгаа хуулиа унш­даггүй парламентын гишүүдэд яах гэж цалин өгдөг юм бэ. Ер нь удахгүй “Амьдралд амжилтанд хүрэхийн тулд заавал уншиж сурах ёстой шүү” гэж хэн нэгэн хүүхдэдээ хэлээд хариуд нь “Яах юм бэ? Хэрэггүй. Бид Коста –Рикогийн парламентын гишүүн болох юм чинь” гэж хариулж магадгүй болж дээ” гэжээ.
Улмаар парламентын ги­шүүд цаашид санал өгч батлаж байгаа хуулиа засч чаддаггүй юм гэхэд ядаж л уншдаг болгохын тулд Ерөнхийлөгч дуулиант хуулийг заавал баталгаажуулах ёстой гэсэн байна.