Гондурасын цахилгаан тусгаарлагч үйлдвэрлэдэг томоохон үйлдвэрийн нэг “Киангшин-Лир” компанийн удирдлага ажиллагсдаа бие засах гэж  байн байн ариун цэврийн өрөө рүү явж ажлын цаг алдуулахгүйн тулд том хүний памперс зүүхийг шаарддаг байсан гэнэ. Энэ компанид долоон жил ажилласан Мария Галиано гэгч эмэгтэй энэ талаар нийтэд дэлгэсэн байна. Гэхдээ үйлдвэрийн захиргаа  памперс авч өгдөггүй ажиллагсдаа өөрсдөө худалдан ав гэж шаарддаг байжээ. Бүх нийтийн хөдөлмөрийн холбооны ерөнхий нарийн бичгийн дарга Даниэль Дюрон энэ мэдээллийг үзээд хөдөлмөрийн хууль, хүний эрх зөрчсөн энэ зүйлийг шалгахыг засгийн газарт нь зөвлөмж болгосон байна.  
Үүнтэй зэрэгцээд тус үйлдвэрийн төлөөлөгч Эдгардо Дюма тэр ажилчин худал ярьж байгаа юм, манайд хөдөлмөрийн хууль зөрчсөн ямар зөрчил байхгүй гэсэн байна. Гэхдээ л Гондурасын Хөдөлмөр, нийгмийн хамгааллын сайд Хорхе Богран тус үйлдвэрт хөдөлмөрийн байцаагч 30 хүн ажиллуулан шалгаж эхэлснээ сэтгүүлчдэд мэдээлжээ.
Өнөөх ажилчин Мария Галиано өмнө хэлснээ улам бататгаж “Би үнэнийг л хэлсэн. Хамт ажиллаж байсан хүмүүс маань ч үүнийг батална. Тухайн үед надад ажлын байрандаа памперс зүүгээд сууж байх ичмээр, бас хэцүү байсан л даа. Тэгээд тэвчиж чадалгүй халагдсан” гэжээ.