АНУ-ын сенатор Жон Маккейн өчигдөр Сирийн асуудлаар хэлэлцсэн Сенатын байнгын хорооны маш чухал хурлын үеэр гар утсаараа тоглож байсныг “Washington Post” сонины гэрэл зурагчин илчилж орхижээ. Сирид цэргийн ажиллагаа явуулах эсэхийг Сенатаар хэлэлцэх үгүйг шийдэх хурал гурван цаг хагас үргэлжилсэн тул бага зэрэг уйдсан Маккейн iPhone-оороо покер тоглосон гэдгээ CNN-д ярьжээ. Тэрээр бүр “Ингэж тоглохдоо хамгийн муухай нь хэдэн мянган доллар алдчихсан” хэмээн хэнэг ч үгүй ярьсан байна.
АНУ-ын Ерөнхийлөгч Б.Обама ард түмнийхээ эсрэг химийн зэвсэг ашигласан гэгдэх Сирийн Башар Ассадын дэглэмийн эсрэг цэргийн ажиллагаа явуулах төлөвлөгөөтэй байгаа билээ. Түүний энэ саналыг тун удахгүй Сенат, Конгрессын хууль тогтоогчид хэлэлцэх хариуцлагатай мөч тулж ирээд байгаа юм. Харин энэ асуудал дээр Бүгд найрамдах намын нөлөө бүхий лидерүүдийн нэг Жон Маккейн иймэрхүү хайнга байдлаар хандсан нь олны гайхширлыг төрүүллээ.