Одоогоос ердөө 20-иод жилийн өмнө буюу Зөвлөлтийн үед оросууд үндэсний баялгаа тэгш хуваарилах зарчимтай байлаа. Гэтэл коммунизм нурснаас хойш 30 жил ч хүрэхгүй хугацаанд тус улсын нийт баялгийн 35 хувь нь 110 хүний мэдэлд очиж амжжээ. 143 сая хүн амтай тус улсад өдгөө 110 тэрбумтан төрж гарчихаад байгаа нь хүн амтай харьцах харьцаа болоод тэдний эзэмших хөрөнгөтэй жишвэл Орос оронд баян ядуугийн ялгаа зааг ямар их болсныг харж болно.
Нийтдээ Оросын хүн амын 93,7 хувь нь 10 мянган ам.доллар хүрэхгүй эд баялагтай гэсэн тоо байдаг. Харин 5,6 хувь нь 10-100 мянган ам.доллар, 0,6 хувь нь 100 мянгаас 1 сая ам.долларын хөрөнгөтэй бол 0,1 хувь буюу 84 мянган хүн нэг сая ам.доллараас дээш хөрөнгөтэй гэсэн судалгаа байна. Үүнийг АНУ-тай харьцуулвал Америкийн хүн амын 30,7 хувь нь 10 мянган доллараас доош хөрөнгөтэй, 33 хувь нь 10-100 мянган ам.доллар, 30,7 хувь нь 100 мянгаас нэг сая ам.долларын хөрөнгөтэй гэж тэмдэглэгдсэн байна. Мөн америкчуудын 5,5 хувь буюу 1,3 сая хүн нэг сая ам.доллараас дээш хөрөнгөтэй ажээ.  
Ер нь дэлхийн жишгийг харвал хөрөнгө нь 50 сая ам.доллараас дээш давсан дэлхийн тэргүүн баячуудын сүлжээнд 98700 хүн багтаж байдаг аж. Үүний бараг хагас нь АНУ-д амьдардаг бол ОХУ 11-д жагсч байна.