АНУ-ын Конгресс төсвийн байгууллагуудаа эргээд ажилд нь оруулах хуулиа баталж, холбооны өрийн хязгаарыг өсгөлөө. Засгийн газраа дахин нээх хуулийг Ардчилсан нам олонх эзэлдэг Сенат болон бүгд найрамдахчууд хянадаг Төлөөлөгчийн танхимын аль аль нь хүлээн зөвшөөрснөөр төсөвгүйгээс хаалгаа бариад байсан байгууллагууд сая нэг ажилдаа орох боломжтой болжээ. Тэгэхээр төсвийн байгууллагын хэдэн сая ажилтан 10 гаруй хоног гэртээ цалингүй суусны эцэст өнөөдрөөс буюу пүрэв гаригаас ажилдаа орж байна. АНУ-ын Засгийн газар, яам тамгын газар, төсвийн байгууллагууд хаалгаа барьсан энэ хэдэн хоногт тус улсын эдийн засагт 24 тэрбум ам.долларын хохирол учирсан байна.  
Хэдийгээр хууль тогтоох байгууллагаас засаг захиргаагаа ажилд нь оруулахуйц төсөв баталсан ч Ардчилсан нам болон Бүгд найрамдах намын санал зөрөлдөж байгаа төсвийн тухай асуудал шийдэгдээгүй л байна. Одоогийн баталсан төсөв бол ирэх оны нэгдүгээр сарын 15 хүртэл хүрэлцэх ажээ.
Ерөнхийлөгч Б.Обама одоогийн гаргасан шийдвэрийг улам баталгаажуулаад ирэх оны төсвөө эрүүл мэндийн даатгалын хуулийг оролцуулахгүйгээр батлах байх гэж найдаж буйгаа мэдэгдлээ. Тэрээр хууль тогтоогчдод хандан хэлсэн үгэндээ асуудал бүхнийг хямралын хэмжээнд аваачиж байж шийддэг байдлаасаа татгалзах хэрэгтэй. Энэ явдлаас бид сургамж авах ёстой гэсэн юм.