Японд 10 давхар барилга авахаар дуудлага худалдаанд 50 сая ам.долларын үнэ хэлсэн Монголын компанийг үнэхээр тийм хэмжээний төлбөр хийх санхүүгийн чадвартай эсэхийг нягтлан шалгахаар Японоос NHK телевизийнхэн ирж сурвалжилжээ. Гэтэл таван тэрбум иенээр  /90 тэрбум төгрөг/ Токиод обьект худалдаж авахаар дуудлага худалдаанд ялалт байгуулсан өнөөх Авар компанийн Улаанбаатар дахь оффисын бүртгүүлсэн хаягаар нь ирээд үзвэл зүгээр нэг орон сууцны байр байж. Мөн татварын газар дахь мэдээллээс нь харвал ямар ч үйл ажиллагаа явуулаагүй, ердөө 600 долларын хөрөнгөтэйгөөр компаниа бүртгүүлж байжээ. Нэгэнт үйл ажиллагаа эрхлээгүй учраас ажилтнууддаа цалин хөлс гэж өгсөн зүйлгүй, улсад татвар, нийгмийн даатгал төлсөн гэх ганц ч баримт байгаагүй байна. Уг нь, Авар компани бизнесийн зөвлөгөө өгөх чиглэлээр үйл ажиллагаа явуулна хэмээн бүртгүүлсэн аж. Гэвч байгаа үгүй нь мэдэгдэхгүй, ямар ч үйл ажиллагаа явуулдаггүй энэ компани Токиод асар өндөр үнээр обьект худалдан авах гэсэн нь япончуудад сэжиг төрүүлэхээс аргагүй биз ээ. Авар компанийн худалдан авах гэсэн барилга нь Япон дахь Солонгос иргэдийн ерөнхий холбооны эзэмшиж байсан байр байсан тухай бид өмнө нь мэдээлж байсан.
Уг обьектыг өнгөрсөн долоо хоногт дуудлага худалдаагаар үнэ хаялцуулан худалдах үед хамгийн өндөр үнэ хэлсэн этгээд нь хэний ч танил бус, Монголын нэг нууцлаг компани байсан нь олны анхаарлыг маш их татсан юм. Уг барилгыг өмнө нь бас нэг удаа дуудлагаар худалдах гэж оролдох үед Хойд Солонгосыг дэмждэг нэгэн хийд авах гэж оролдоод, эцэстээ бэл нь хүрэхгүй саналаасаа татгалзсан аж. Гэтэл хоёр дахь шатны дуудлага худалдаанд мөн л Хойд Солонгостой сайн харилцаатай байдаг Монголын компани анх нэрлэсэн үнээс нь бараг хоёр дахин өндөр үнэ хэлсэн нь тэдний цаана солонгосчууд байгаа юм биш биз гэсэн хардлагыг төрүүлэхэд хүргэжээ. Ямартай ч, Авар компанийг судалж, хуулийн дагуу итгэл хүлээлгэж болох эсэхийг шалгасны эцэст тус компанид барилгыг худалдах эсэхийг шүүх маргааш шийдэх аж. Учир нь, байрыг өмнө нь эзэмшиж байсан Япон дахь Солонгос иргэдийн ерөнхий холбооны үйл ажиллагаа үндсэндээ дампуурч, шүүхийн шийдвэрээ барилгыг дуудлагаа худалдаж байгаа тул эцсийн шийдвэрийг Токиогийн дүүргийн шүүх гаргах юм байна.