Монгол Улсын иргэн 36 настай эрэгтэй супермаркетын хамгаалалтын ажилтныг хутгалсан хэрэг гаргажээ. Чехийн Idnes.cz сайтад бичсэнээс үзвэл өнгөрсөн дөрөвдүгээр сард Отроковиц хотод тэр эрэгтэй супермаркетаас нэг шил дарс хулгайлсныг хамгаалалтын ажилтан хараад саатуулсан байна. Цагдаагийнхныг ирэхийг хүлээх зуур монгол эр хамгаалалтын ажилтныг хутгалж хөнгөн гэмтэл учруулсан аж. Түүний цуснаас 3,3 промилль согтууруулах бодис илэрсэн байна.
Дээд боловсролтой, Монголд биеийн тамирын багшаар ажиллаж байсан энэ эрэгтэй Чехэд зургаан жилийн өмнө эхнэрийн  хамт ирж гутлын үйлдвэрт ажиллах хугацаандаа хоёр хүүхэдтэй болжээ. Чех хэл суралгүй, ажил таслан, согтуурснаас болж ажлаасаа гарсан болохоор сүүлдээ ийн хулгай хийх болсон байна. Өнгөрсөн есдүгээр сард анхан шатны шүүх хурал болж хэргийг нь мөрдөн байцаалтад буцаажээ. Сэжигтэн болохоор  болсон үйл явдлыг огт санахгүй байна гэж мэдүүлдэг гэнэ.
Түүний буруутай нь нотлогдвол 18 жилийн хорих ялаар шийтгүүлэх юм гэж prague-express.cz  сайтад бичжээ.