Анголын Батлан хамгаалах яам, Оросоос тэрбум ам.долларын үнэ бүхий зэвсэг, байлдааны техник худалдан авах гэрээг “Рособоронэкспорт”компанитай байгуулжээ. Гэрээний дагуу анголчууд зөвлөлтийн үед үйлдвэрлэгдсэн зэвсэглэлийн сэлбэг, буу, сум, танк, их буу, Ми-17 нисдэг тэрэг худалдан авна. Мөн Анголын нутаг дээр сумны үйлдвэр барихаар тохиролцжээ. Үүнээс гадна засч сэлбэн, зэвсэглэсэн Су-30К сөнөөгч онгоц 18 ширхгийг авах аж. Гэхдээ Ангол нь төлбөрөө ямар хэлбэрээр хийх нь тодорхойгүй байгаа юм. Зарим эх сурвалжид Ангол бэлэн мөнгөөр тооцоо хийнэ гэсэн байхад өөр нэг нь Оросын “Гадаад худалдааны банк” энэ гэрээг санхүүжүүлэх болсон тухай ярьсан гэж “Ведомости” сонин мэдээлж байна.
Орос нь 1996 онд Анголын Зөвлөлтөд төлөх ёстой байсан өрийн 70 хувийг өршөөсөн юм. Үлдсэн 30 хувийг нь Ангол 20 жилийн дотор төлөхөөр болсон.