Саудын Арабын Дотоод хэргийн яамнаас эмэгтэй жолооч нарыг хууль ёсоо тохуурхан, үл тоомсорлохгүй байхыг анхааруулав. Тус улсын эмэгтэйчүүд жолоо барих эрхийнхээ төлөө олноороо нэгэн зэрэг машин барьж эсэргүүцлээ илэрхийлэхээр зэхэж байгаа юм. Харин үүний эсрэг яамнаас анхааруулсан мэдэгдэл хийхдээ эмэгтэйчүүдийн жолоо барихыг хориглосон хуулийг эсэргүүцсэн хэн боловч ял шийтгэл хүлээнэ гэсэн байна. Гэвч араб эмэгтэйчүүд эрчүүдийн адил жолооны ард суух эрхээ олж авахын тулд өнөөдөр олон нийтийг хамарсан эсэргүүцлийн үйл ажиллагаа зохион байгуулах гэж байгаа бөгөөд хуулиа өөрчлөхийг уриалсан өргөх бичигт 17 мянган бүсгүй гарын үсгээ зуржээ.   
Саудын Арабын эрх баригчдын хувьд энэ хоригийг бүрмөсөн цуцлах эсэх асуудлаар хоёр өөр байр суурьтай байгаа учир өдий хүртэл шийдвэр гаргаж чадахгүй байгаа юм. Араб эмэгтэйчүүд бүр 1990 оноос л жолоо барих эрхийнхээ төлөө тэмцэж байсан боловч түүнээсээ болоод ажлаасаа халагдах, баригдаж хоригдох гэх мэт саад бэрхшээлтэй тулгарсаар байгаа аж.