Хайян хэмээх хар салхи Филиппинийг дайран өнгөрөхдөө хэдэн мянган хүний амь насыг авч одсон билээ. Хэдий гамшгийн аюул холдсон ч түүний учруулсан хор хохирол өөр олон олон мянган хүний амь нас, ахуй амьдралд одоо хүртэл заналхийлсээр байна.
Хар салхи явж өнгөрснөөс тав хоногийн дараа төрсөн Алти Мустациа хэмээх гуравхан хоногтой охин өнөөдөр эмнэлэгт нас баржээ. Төрмөгцөө уушиг нь ажиллахгүй, амьсгалын дутагдалд орсон охиныг уг нь инкубаторт хийж, эмчлэх ёстой ч гамшгийн улмаас эмнэлгийн барилга ноцтой эвдэрч, үерт автаж, дээвэр нь унаж, хамгийн гол нь цахилгаангүй болжээ. Ингээд охины амийг торгоохын тулд гурван өдөр, гурван шөнийн турш эцэг эх нь амьсгалын аппаратыг нь өөрсдийн гараар  ажиллуулжээ.

Тэд охиныхоо уушгинд өөрсдийн гараар агаар шахаж байсан ч энэ бүхэн бүхэн мэдээж бяцхан охиныг аврахад хангалтгүй байсан учир бие нь муудсаар амьсгал хураасан байна.
Өнөөдөр Филиппиний гамшигт өртсөн газар орон бүрт иймэрхүү байдал нийтлэг үзэгдэл болоод байна. Гамшгийн улмаас орон гэртээ дарагдаж, тусламж авч чадаагүй олон мянган хүнийг арай гэж төв бараадуулан эмнэлэг хүргэж байгаа ч эмнэлэг нь өөрөө гамшигт нэрвэгдээд өвчтөнүүдээ хүлээн авч, эмчилгээ үйлчилгээ үзүүлэхэд тун бэрх байгаа аж. Зарим эмнэлэг бүр сургуулийн байр руу түр нүүдэллэж, эмчилгээ хийж байна.