Сура хэмээх энэ бяцхан сармагчин дөрвөн сартай. Эхийнхээ халамжаас ч гарч амжаагүй энэ бяцхан амьтны гурван хурууг хэн нэгэн тайрч орхижээ. Сура болон түүнтэй ижил орангутаны амьдардаг гол бүс нутаг болох Индонезийн Борнеогийн ойг бизнес эрхлэгчид сүйтгэж байгаагаас энэ мэт явдал их гарах болжээ. Тэд далдуу мод их хэмжээгээр тарихын тулд хуучин моднуудыг нь тайрч булгалж хаяж байгаа аж. Далдуу модны тосыг бизнес эрхлэгчид саван, үнэртэй ус гэх мэт гоо сайхны бүтээгдэхүүн хийхэд ашигладаг учраас ашиг авчирдаг мод тарихын тулд Борнеогийн ойг ийн "цэвэрлэж" байгаа аж. Яаран сандран мод огтолж байгаа хүмүүс л Сурагийн хуруунуудыг цавчиж орхисон бололтой.

 Суратай ижил орангутан сармагчингууд ой модоо хүмүүст алдаад одоо амьдрах газаргүй болж хэцүүдэж байгаа аж. Тийм ч болохоор тэдний тоо толгой сүүлийн жилүүдэд эрс буурч байгаа гэнэ. Одоогоос 100 гаруй жилийн өмнө Индонезид 315 мянга орчим орангутан байсан гэдэг тоо бий ч өдгөө ердөө 50 гаруй мянга нь л үлджээ. Энэ ойн ойр орчмын тосгоны иргэд орангутаныг гэртээ авчирч, бусдад үзүүлж зугаацах зорилгоор ашиглах нь түгээмэл болсон бөгөөд ингэж гэртээ байлгахдаа хоол унд өгч тэжээхгүй, амьтан зовоож байгааг амьтны эрхийг хамгаалагчид хэлж байна.
Сурагийн хувьд амьтны эрхийг хамгаалагчдын асрамжинд орж, хуруугаа эмчлүүлсэн байна.