Хятадын Зилинь мужид болсон 5,0 магтнитудын хүчтэй цуврал газар хөдлөлтийн улмаас 260 мянган өрхийн орон байр гэмтэж, 45 мянган хүнийг аюулгүй газар руу нүүлгэн шилжүүлэх шаардлага гарсан тухай “Синьхуа” агентлаг өнгөрсөн бямба гарагт мэдээлэв. Орон нутгийн эрх баригчид учирсан хохирлын хэмжээг хоёр тэрбум юань гэж тогтоожээ. Байгалийн гамшигт өртсөн нутаг руу аврагчдыг явуулсан ч цас их орсон, огцом хүйтэрснээс болж аврах ажиллагаа явуулахад ихээхэн бэрхшээл тулгараад байгаа аж.

Байгалийн гамшгаас гадна бас нэгэн таагүй хэрэг Циндао хотноо болсон байна. Энэхүү боомт хотод байдаг газрын тос боловсруулах, химийн үйлдвэрлэл эрхэлдэг “Sinopec” компанийн мэдлийн нефть дамжуулах хоолой дэлбэрчээ. Дэлбэрэлтийн улмаас 52 хүн амиа алдаж, 11 хүн сураггүй алга болсон байна. Дамжуулах хоолойд засвар хийх явцад газрын тосны бүтээгдэхүүн алдагдасны улмаас дэлбэрэлт болсон гэдгийг хэргийн газарт ажилласан аврагчид тогтоожээ. Дэлбэрэлт асар хүчтэй байсан бөгөөд ойролцоох замын асфальтыг хуулж, байшин барилгын ханын нураасан төдийгүй олон зуун метрийн цаана зогсоол дээр байсан машинуудыг цонх хага үсэрчээ.