Хойд Солонгосоос дүрвэгчийн дүрээр орж ирээд байсан тагнуулд Өмнөд Солонгосын дээд шүүхээс таван жил хорих ял оноожээ. 47 настай Ли гэгч эмэгтэй нь 2011 онд Өмнөд Солонгост орж ирэхээсээ өмнө Хятадад ажилладаг өмнөдийн тагнуулуудын талаар мэдээлэл цуглуулж байсан гэдгийг мөрдөн байцаалтын явцад тогтоожээ. Шүүгч Ко Ен Хан “Ли нь Шэньян, Циндао, Бээжин зэрэг хотод тагнуул хийж, манай улсын үндэсний аюулгүй байдлын хуулийг зөрчсөн гэж үзээд ялласан доод шатны шүүхийн шийдвэртэй санал нийлж байна” гэжээ.
Ли нь 2011 онд Хойд Солонгосын дүрвэгчдийг хүлээн авах хөтөлбөрийн дагуу Өмнөд Солонгост орж ирээд байхад нь тусгай шалгалтын явцад баривчлан илчилсэн тул тагнуулын ажиллагаа явуулж амжаагүй байсан аж. Ли Хойд Солонгосын эрх баригчдын гэр бүлд заналхийлж байсан болохоор тагнуул хийхээс өөр аргагүй байдалд орсон гэж мэдүүлжээ.