Газрын тосны орд газар, далайн боомтууд орчим амьдардаг иргэд, зэвсэгт бүлэглэлүүдийн үйл ажиллагааны улмаас Ливийн эдийн засаг дампуурах дээрээ тулаад байгаа тухай тус улсын Ерөнхий сайд Али Зейдан мэдэгджээ. Цалин хөлсөө нэмүүлэх, ажлын нөхцлийг сайжруулах, өөрийгөө удирдах илүү их эрх мэдэл шаардсан хүмүүс газрын тосны орд газрууд, нефт экспортолдог боомтуудыг ажиллах боломжгүй болгоод байгаа аж. Үүний улмаас Ливийн газрын тосны экспортын хэмжээ сүүлийн хэдхэн сарын дотор 80 хувиар унажээ. Дотоод байдал харьцангуй тайван үед хоногт 1,5 сая баррель газрын тос олборлодог байсан Ливи одоо хоногт 250 мянган баррель хүрэхтэй үгүйтэй хэмжээнд л олборлолт явуулж байгаа ажээ. Гэтэл Ливи нь төсвийнхөө 96 хувийг газрын тосны экспортын орлогоос бүрдүүлдэг.
Ийнхүү олборлолт, экспортын хэмжээ огцом буурахтай зэрэгцэн иргэд нь цалин хөлс нэмэгдүүлэх, нийгмийн халамжаа өсгөхийг шаардаж байгаа тул Ливийн төв засгийн газар төлбөрийн чадваргүй болсон аж.
Муаммар Каддафийг түлхэн унагасан хувьсгалын дараагаар Ливи нь төв Засгийн газартаа захирагддаггүй олон тооны зэвсэглэлт бүлэглэлүүдийн мэдэлд байдаг бутархай улс болж хувирчээ.