ОХУ-ын Ерөнхийлөгч В.Путин Ватиканд айлчлах үедээ Ромын пап лам Франсуатай уулзахаар товлосон цагаасаа бүтэн 50 минут хоцорсон явдал гарчээ.  Пап ламын элч төлөөлөгчид Оросын төрийн тэргүүнийг угтаж авахаар гадаа чичиртлээ зогсч хүлээснийг хэвлэлийнхэн гэрчилж байна. Түүний хоцорсон шалтгааныг одоогоор хэн ч тайлбарлаагүй байна.
В.Путин уулзахаар болзсон хүмүүсээ хүлээлгэдэг явдал ганц үүгээр зогсохгүй. Тэрээр өнгөрсөн сарын эхээр Өмнөд Солонгост айлчлах үедээ тус улсын Ерөнхийлөгч Пак Кин Хетэй уулзах албан ёсны уулзалтаасаа 30 минут хоцорсон юм. В.Путин Ерөнхийлөгчийг нь хүлээлгэн байж тус улсын зодооны урлагийн мастеруудтай уулзаж ярилцсан гэнэ. Тийм ч учраас Солонгосын хэвлэлүүд “Ноён Путин, дараагийн удаа цагаа бариарай” хэмээн бичиж байв. Гэвч өндөр хэмжээний уулзалтаас хоцрох, эсвэл уулзалтын товлосон хугацааг сунжруулах нь В.Путиний хувьд гэм биш зан болтлоо элбэг болжээ.

 Тухайлбал, 2003 онд хатан хаан II Элизаветатай уулзахдаа 14 минутаар уулзалтын хугацааг хэтрүүлсэн бол 2012 онд Германы канцлер Ангела Меркельтэй уулзахдаа 40 минут хоцорч иржээ. Мөн АНУ-ын Төрийн нарийн бичгийн дарга Жон Керритэй Сирийн асуудлаар хэлэлцэхдээ уулзалтаа гурван цаг гаруй сунжруулсан  бол  Украины Ерөнхийлөгч Виктор Януковичтой Крымд уулзахаар товслон цагаасаа бүхэл бүтэн дөрвөн цаг хоцорсон удаатай. Тэрээр уулзалтаас аль хэдийнэ хоцорсон атлаа замдаа нэгэн байкертай ярьж хүртэл амжсан гэнэ.  
В.Путин ийнхүү дэлхийн томоохон удирдагчидтай уулзахдаа хүртэл цаг барьдаггүй явдал нь нэг талаар өөрийнөө хүч нөлөөг мэдрүүлэх гэсэн хэрэг хэмээн улс төрийн тоймчид хэлдэг ч тэр бүр залуугаасаа л цаг барихдаа муу байсныг эхнэр нь хэлдэг. Түүний салсан эхнэр Людмила нэгэн ярилцлагадаа В.Путин болзоондоо дандаа хоцорч, түүнийг хүлээлгэдэг байсан гэсэн бол ноён Ерөнхийлөгч өөрөө ч хэвлэлд нэгэнтээ дунд сургуулийн үеэ дурсахдаа “Хувцаслах ч цаг байхгүй хүрмээ ч өмсч амжилгүй сургууль руугаа сум шиг хурдан чавхддаг байлаа” хэмээн ярьсан байдаг.