Улс орны эдийн засаг, бизнесийн орчныг энэ онд судалж дүгнэсэн “Бизнес эрхлэхүй 2014” тайлан гарахад бэлэн болжээ. Тайлангийн чухал шалгуур “Барилгын зөвшөөрөл авах” үзүүлэлтээр судалгаанд хамрагдсан 189 орноос Монгол Улс 107 дугаарт жагсч байна. Хэдий хойгуур орсон ч энэ нь өмнөх оноосоо 25 байраар урагшилсан ахицтай мэдээ гэдгийг мэргэжилтнүүд хэллээ. Өөрөөр хэлбэл, энэ жил барилгын зөвшөөрөл авах ажлыг түргэвчилж, хөнгөвчилж, шинэчилсэн нь өмнөө байсан 25 орныг гүйцэхэд нөлөөлжээ. Гэсэн хэдий ч барилгын ажил эхлүүлэх, үргэлжлүүлэх зөвшөөрөл авах нь нэлээд төвөгтэй процесс хэвээр байгаа бөгөөд төрийн ажил, хүнд суртал хэр хэмжээтэйг илтгэнэ. Одоогийн байдлаар 20 шат дамжлагаар төрийн эрх бүхий 12 байгууллагатай харьцаж, нийт 186 хоног зарцуулдаг аж.
Цаашид барилгын зөвшөөрлийн асуудлыг цэгцлэхэд үндсэндээ гурван чухал асуудал тулгарч буй юм. Юун түрүүнд, хууль тогтоомж, эрхзүйн орчинг цэгцлэх хэрэгтэй гэж АНУ-ын Олон улсын хөгжлийн агентлаг “USAID”-ын шинжээч хэллээ. Үүний дараа барилга байгууламжийг эрсдэлээр нь ангилаад зөвшөөрлийг яам, орон нутгийн удирдлага хариуцан олгох, нэг цэгийн үйлчилгээг өргөжүүлэх хэрэгтэй гэсэн юм. Сонирхуулахад, энэ удаагийн тайланд 41 дүгээр байрт орсон Украйнд барилгын зөвшөөрөл авахын төлөөх 10 шат дамжлагад 73 өдөр зарцуулдаг болсноор өмнөх оноос 145 байраар урагшилжээ. Харин Өмнөд Солонгос 18 дугаар байрт орсон бөгөөд 11 хоногт гуравхан шат дамжиж, зөвшөөрөл авахдаа нийт 29 хоног зарцуулдаг байна. Барилгын зөвшөөрөл олгох ажлыг түргэвчилж, хялбаршуулах нь аливаа төслийн явцыг хурдасгах, эдийн засгаа төдий хэмжээгээр эрчимжүүлэх сайн талтай ажээ.